Камол қози мадрасаси (Қўқон)

Камол қози мадрасаси

Камол қози мадрасаси - Қўқондаги меъморий ёдгорлик (19-а.). Камол қози мадрасаси биноси дарсхона, айвонли масжид, ҳовли ва кичик ҳужралардан иборат. Дарвозахона серҳашам бўлиб, Худоёрхон ўрдасида бўлгани каби бу бинода ҳам фақат кириш қисми (сирти) зеб бериб ишланган.

Пештоқ тепаси рангбаранг нақшлар билан қопланган бўлиб, ҳандасий шакллар арабий битиклар билан уйғунлашиб кетган. Пештоқининг икки ёнидаги устунгўшалар юқориси безакли кафаса билан якунланган. Дарвозахона икки қаватли. Устки қаватдаги дарсхона олди пешайвонли бўлиб, панжара билан тўсилган. Томи 4 қиррали-чортарк гумбаз билан қопланган. Ҳовли атрофига масжид ва ҳужралар қурилган. Масжид 4 устунли, шарқ томони очиқ, тўсин ташлаб қурилган айвони бор. Унинг ички томони ганч билан ишланган. Сирти сувоқсиз. К. қ. м. меъморлигида қўқонлик халқ усталарининг анъаналари ўз ифодасини топган. Мадраса таъмир қилиниб, ундан меҳмонхона сифатида фойдаланилмоқда.

Ўзбекистон миллий энциклопедияси, биринчи жилд. Тошкент, 2000-йил.

Рейтинг@Mail.ru

 

МАҚСАДИМИЗ

Миллий қадриятларимиз, маънавий бой меросимизни тиклаш ва уларни чуқур ўрганиш, унинг мазмун-моҳияти ва аҳамиятини халқимиз ўртасида тарғиб этиш, Имом Бухорий, Имом Термизий, Абу Мансур Мотуридий, Бурҳониддин Марғиноний, Баҳоуддин Нақшбандий ва Маҳмуд Замахшарий сингари юртимиздан етишиб чиққан буюк муҳаддис, фақиҳ, тасаввуф ва муфассир алломалар меросини ҳар томонлама теран ўрганиш, юксак инсоний ғоялар ва муқаддас қадриятларимизни ўзида ифода этган манбаларни тадқиқ этиш, улардан диний таълим, маънавий-ахлоқий тарбия ишларида фойдаланиш, диний ходимларнинг малакасини, билим ва тажрибасини ошириш бўйича ўқув-услубий ишларни амалга ошириш, ёш авлоднинг руҳий ва маънавий оламини бойитиш, азалий миллий қадриятларимизни сақлаш ва улуғлаш, юртимиз тарихи зарварақларига олтин ҳарфлар билан муҳрланган нодир қўлёзмаларни келгуси авлодларга етказиш, аждодларимиз ҳаёти, ахлоқи ва юксак маънавиятини ифодаловчи матнларни таржима қилиб, ёшлар қалбида улар қолдирган меросга ҳурмат, эъзоз ва муҳаббат туйғусини шакллантириш, юртимиз Мовароуннаҳрнинг Бухоро, Самарқанд, Марв, Урганч, Ахсикет, Хива, Шош, Марғинон ва бошқа шаҳарларидаги маърифат масканлари бўлмиш мадрасаларда етишиб чиққан алломалар ҳақида, улар таҳсил олган мадрасалар ва ҳозирда юртимиз Ўзбекистонда ишлаб турган мадрасалар ҳақида талабаларга маълумот бериб бориш.
БИЗ БИЛАН БОҒЛАНИШ:  [email protected]